దేవాలయములకు వెళ్ళుట వలన ఏమి పొందుతున్నాము?

దేవాలయం = దేవ + ఆలయం

దేవుని యొక్క ఆలయం. అనగా దైవం నివసించు ఆలయం. భగవంతుడు ప్రతి అణువులోనూ ఉన్నాడని మన వేదములు చెప్పుచున్నవి. అణువణువున ప్రపంచమంతా నిండి ఉన్న పరబ్రహ్మ ప్రతి జీవిలోనూ ఉన్నాడని గ్రహించవలెను. ప్రతి జీవిలోనూ ఉన్న పరమాత్మ మనలోనూ ఉన్నాడు.
ఆ పరమాత్మ నివశించు మన శరీరమునే ఆలయము, దేవాలయము అని చెప్పుచున్నాము. మన శరీరమునే బాహ్య ప్రపంచమున దేవాలయముగా ఒక కట్టడముగా మన పూర్వీకులు చూపించిరి.

దేవాలయమునకు వెళ్లి మనము తెలుసుకొన వలసినది అక్కడ ప్రతిరూపముగా చూపబడిన దైవము మన శరీరములో కొలువై ఉన్నాడని, దైవత్వమును పొందుటకు మనము ఏ విధముగా కృషి చేయవలెనని తెలుసుకొనవలెను. ఈ జ్ఞానమునే మనము దేవాలయములలో పొందుచున్నాము. జ్ఞానము పొందుటయే మన ఏకైక లక్ష్యముగా దేవాలయమును సందర్సించినచో అన్ని రహస్యములూ స్పష్టంగా తెలియవచ్చును. అది లేక ప్రతిరూపమైన ఆలయమును ఆడంబరమునకై ఏ దైవ సంకల్పమూ లేక సందర్శించినచో మనము దేవాలయమునుండి పొందవలసిన ఏ జ్ఞానమూ పొంద లేము.